Ամանորյա զարդարանքը կարծես թե միայն Երևանի կենտրոնի համար է, սրա մասին են վկայում ծայրամասային հատվածների ամանորյա զարդարանքները:

Սոցցանցերում տարածվել է մի լուսանկար, որտեղ երևում է, թե ինչ անմխիթար վիճակում է Շենգավիթ վարչական շրջանում գտնվող Գարեգին Նժդեհի հրապարակում գտնվող տոնածառը: Հանրապետության հրապարակի շքեղ զարդարանքի հակապատկերը հենց այնտեղ է:

Հաշվով մի քանի խաղալիք մեծ տոնածառի վրա, մինչդեռ այս տարի Երևանի քաղաքապետարան ամանորյա զարդարանքների համար հատկացրել է 549 մլն 706 հազար դրամ:

ArmLur.am-ը կապ հաստատեց Երևանի քաղաքապետի մամուլի քարտուղար Հայկ Կոստանյանի հետ՝ հասկանալու համար՝ինչն է նման իրավիճակի պատճառը:

Վերջինս նշեց.

«Շենգավիթ վարչական շրջանի տոնածառը դեռ 2010 թվականից գնված տոնածառ է, այդ նույն տոնածառը տեղադրել ենք, դա եղել է նաև նախորդ տարի»։

Նա նշեց, որ բոլոր վարչական շրջաններում նախկինում գնված տոնածառերն են։

Հիշեցնենք, որ այս տարի Երևանում Ամանորին նվիրված նախապատրաստական աշխատանքները սկսվել էր 2 ամիս շուտ՝ նոյեմբերի 1-ից:

Էմմա Մարտիրոսյան