SHAMSHYAN.com-ի տեղեկություններով՝ օգոստոսի 19-ին գողության դեպք է տեղի ունեցել Լոռու մարզում։ Ժամը 19։20-ի սահմաններում Լոռու մարզի բնակիչ 76-ամյա Վրեժ Ղ․-ն դիմել է ՀՀ Ներքին գործերի նախարարության ոստիկանության Բազումի բաժին և հայտնել, որ նույն օրը ժամը 17։30-ի սահմաններում, այցելելով Տիգրան Մեծ փողոցում գտնվող՝ իր տնօրեն, Լոռու մարզի բնակիչ 69-ամյա Հայկ Հ․-ի չբնակեցված և իր հսկողությանը հանձնված բնակարան, նկատել է, որ հուլիսի 10-ից մինչև օգոստոսի 19-ն ընկած ժամանակահատվածում տան մուտքի դուռը հարմարեցված բանալիով բացելու միջոցով մուտք են գործել բնակարան և գողացել կտավներ:

Ինչպես հայտնում է ֆոտոլրագրող Գագիկ Շամշյանը, ոստիկանության Բազումի բաժնի ծառայողների կողմից ձեռնարկվում են միջոցառումներ հանցագործությունը բացահայտելու ուղղությամբ:

Դեպքի փաստով ոստիկանության Բազումի բաժնում ձևակերպվել են փաստաթղթեր, որոնք փոխանցվել են ՀՀ Քննչական կոմիտեի Լոռու մարզային քննչական վարչություն:

Ֆոտոլրագրողի տեղեկություններով՝ Վրեժ Ղ․-ն աշխատում է «Կանակա» ԲԲԸ-ում՝ որպես վարորդ, իսկ Հայկ Հ․-ն «Կանակա» ԲԲԸ-ի տնօրենն է։