Ադրբեջանի արտգործնախարար Ջեյհուն Բայրամովը հայտարարել է, որ Հայաստանը «պետք է ավելի շատ ջանքեր գործադրի երկու երկրների հարաբերությունները կարգավորելու համար», գրում է Ինտերֆաքսը։
«Մենք կոչ ենք անում հայկական կողմին բարի կամք դրսևորել և ավելի շատ ջանքեր գործադրել բոլոր ուղղություններով հարաբերությունները կարգավորելու քննարկումներում», — այսօր՝ մայիսի 8-ին, ասել է Բայրամովը Վիլնյուսում իր լիտվացի գործընկեր Գաբրիելիուս Լանդսբերգիսի հետ բանակցություններից հետո։
Բայրամովը հայտարարել է, որ չնայած երկկողմ շփումների որոշակի դինամիկային (Բաքու և Երևան — խմբ.)՝ առաջընթացը ձեռք է բերվել տարբեր ոլորտներում, մասնավորապես խաղաղության պայմանագրի նախագծի շուրջ, որը սահմանում է երկկողմ հարաբերությունները, պետական սահմանների սահմանազատումը և տրանսպորտային ու հաղորդակցական կապերի վերականգնումը, սակայն այն «դեռ չի արդարացրել իրենց սպասելիքները»։
«Մենք կարծում ենք, որ երկու երկրների հարաբերությունները կարգավորելու լավագույն ճանապարհը հիմնված է փոխադարձ ճանաչման և ինքնիշխանության և տարածքային ամբողջականության հարգման վրա», — ասել է Բայրամովը՝ հայտարարելով, որ Ադրբեջանի դիրքորոշումն այս հարցում «հստակ, սկզբունքային և մշտական է»։