«Ալ-Նասրի» պորտուգալացի ֆուտբոլիստ Կրիշտիանու Ռոնալդուն հասկացրել է, որ մտադիր չէ լքել սաուդյան ակումբը և վճռական է հաջորդ մրցաշրջանում առաջին գավաթը նվաճելու հարցում:
Ռոնալդուի թիմն այս մրցաշրջանում մնացել է առանց գավաթների՝ զիջելով տիտղոսի համար պայքարում «Ալ Իթիհադին»:
«Ես երջանիկ եմ, ցանկանում եմ և կշարունակեմ խաղալ այստեղ: Իմ կարծիքով, եթե նրանք շարունակեն այն աշխատանքը, որը ցանկանում են անել, ապա առաջիկա հինգ տարում Սաուդյան Արաբիայի առաջնությունը կարող է մտնել աշխարհի թոփ 5 լիգաներ։
Ես հույս ունեի ինչ-որ բան հաղթել այս մրցաշրջանում, բայց չարեցինք: Բայց շատ դրական եմ տրամադրված ու վստահ եմ, որ ամեն ինչ կփոխվի ու կգնա դեպի լավը։ Եկեք հավատանք դրան և աշխատենք այս ուղղությամբ»,- Ռոնալդուի խոսքերն է մեջբերում Սաուդյան Արաբիայի առաջնության մամուլի ծառայությունը։
38-ամյա պորտուգալացին հունվարի 2-ին է միացել «Ալ-Նասրին»: Ակումբի հետ պայմանագրով նա տարեկան կստանա 200 միլիոն եվրո։
Այս մրցաշրջանում պորտուգալացի հարձակվողը բոլոր մրցաշարերում անցկացրել է 19 հանդիպում՝ դառնալով 14 գոլի և երկու գոլային փոխանցման հեղինակ:
